Tuesday, February 28, 2012

ಒಂದು ಬಾರಿ ನಗುತ ಬಾರೆ !


ಒಂದು ಬಾರಿ ನಗುತ ಬಾರೆ ತೋಳ ತೆಕ್ಕೆಗೆ
ಮಂದ ಗಾಳಿ ನೀಡುತಿಹುದು ಸರಸಕೊಪ್ಪಿಗೆ

ಕರಗಿ ಹೋದ ಚಂದ್ರ ಕೂಡ ನಿನ್ನ ಲಜ್ಜೆಗೆ
ಸುರರು ನಾಚಿ ಕರುಬುತಿಹರು ನಿನ್ನ ಮುದ್ದಿಗೆ

ನಿನ್ನ ಮುತ್ತನೆತ್ತರಿಸೆ ಅವು ತಾರೆಯಾಯಿತೇ?
ನಿನ್ನ ದನಿಯ ಕೇಳೆ ಧರೆಯು ಮೂಕವಾಯಿತೇ?

ಮೇರೆ ಮೀರದೆಂದೂ ನನ್ನ ಸ್ವಾರ್ಥದಾ ಬಲ
ನೀರೆ ನಿನ್ನ ಸೇರೆ ಬಾಳೋ ಒಂದೇ ಹಂಬಲ

ಚೆಲುವು ಅಂದರೇನು ಅರಿಯೆ ಒಲವೆ ಚೆಲುವೆನೆ
ಗೆಲುವು ಸೋಲು ಪ್ರೀತಿಗಿಹುದೆ ಸೋತೆ ಸುಮ್ಮನೆ

Tuesday, February 7, 2012

ನನ್ನ ನಿಲುವು.


ಕೆಲವೊಮ್ಮೆ ಹಾಗೆಯೇ
ಚಡ್ಡಿಯೊಳಗೆ ನಾನೇ ಸಿಲುಕಿದಂತೆ !
ಬೇರೆಯವರು ಕಾಣದಂತೆ
ಸ್ವಲ್ಪವೇ ತೋರುವಂತೆ
ಕುತೂಹಲ ಕಣ್ಣಲ್ಲೇ ಇರುವಂತೆ
ಕಾಯ್ದುಕೊಂಡಿದ್ದೇನೆ !

ಆಗಾಗ ಗೋಡೆ ಹಾರುವಾಗ
ಜಾತ್ರೆಬೀದಿಗಳಲ್ಲಿ ತಿರುಗುವಾಗ
ಆಕಸ್ಮಿಕವಾಗಿ ಚಡ್ಡಿಯ
ಬಿಗುವು ಸಡಿಲಿದಂತೆ !
ಆದರೂ , ಬೀಳದಂತೆ
..ನೋಡಿಕೊಂಡಿದ್ದೇನೆ !

ಸಿಟ್ಟು ಬರುವುದು ನೀವೆಳೆಯುವಾಗ ಸ್ವಾಮಿ !
ಕಾಣದ ಕೈಯ್ಯೇನಲ್ಲ ನಿಮ್ಮದ್ದು !
ಗೊತ್ತು, ನಿಮಗಾಗುವುದಿಲ್ಲವಿದು
ಆದರೂ ಎಳೆಯುತ್ತೀರಿ !
ನಾನೂ ಹಾಗೆಯೇ,

ಯಾಕೆಂದರೆ
ಹಿಡಿದುಕೊಳ್ಳುವುದರಿಂದ
ಎಳೆಯುವುದು ಸುಲಭ !!