ಧರ್ಮ!

ನೂರು ದಾರದ ಎಳೆಯ ಸೇರಿಸುತ ಬಂಧಿಸುತ
ಮಾಡುವೆವು ಧರಿಸುವಾ ವಸ್ತ್ರವೆಂದು
ಸಾರವಿಹ ನೂರಾರು ಅನುಭವದ ಮಾತುಗಳ
ರೂಢಿಯಲಿ ಕರೆದಿಹರು ಧರ್ಮವೆಂದು

ಬಿಳಿಯ ದಾರದ ನಡುವೆ ಕಪ್ಪು ಕೆಂಪಿನ ಬಣ್ಣ
ಧರಿಪ ವಸ್ತ್ರಗಳೆಲ್ಲ ಎಷ್ಟು ಭಿನ್ನ
ಸುಳ್ಳಿಹವು ಮುಳ್ಳಿಹವು ಫಲಬಿಡುವ ಮರದಲ್ಲಿ
ಆಯಬೇಕೋ ಗೆಳೆಯ ನಿಜದ ಹಣ್ಣ.

ಏನಾದರೇನ್ ಬಣ್ಣ ನಿಜದ ಬೆಂಕಿಯ ಬಿಸಿಗೆ
ಸುಟ್ಟು ಹೋಗದೆ ವಸ್ತ್ರ? ಬೂದಿ ಉಳಿಸಿ
ಧರ್ಮವೂ ಹೀಗಣ್ಣ ಮೇಲಿಲ್ಲ ಕೀಳಿಲ್ಲ
ನಾಳೆ ಏನಿಹುದಣ್ಣ? ಬಾಂಧವ್ಯ ಬೆಳೆಸಿ.