ನಾನು ಅವಳು !

ನಗುವಲ್ಲೆ ಸಿಕ್ಕಿರುವ ಅವಳ ನಾನು ನಗಿಸಬೇಕು
ನಗುತ ನೋವು ಕರಗಬೇಕು
ಬಿಗಿಯಾದ ತೋಳಿಂದ ಅವಳ ಬಳಸಬೇಕು
ಬಳಸಿ ನೀ ನನಗೆನಬೇಕು !

ಕಾರಿರುಳ ಕತ್ತಲಲಿ, ಅವಳ ಕೂಗಿ ಕರೆಯಬೇಕು
ಕರೆದು ಕೆನ್ನೆ ಚಿವುಟಬೇಕು
ಹುಸಿಮುನಿಸು ತೋರಿಸುವ ಅವಳ ನೋಡಬೇಕು
ನೋಡಿ ಮತ್ತೆ ರಮಿಸಬೇಕು !

ಮೋಹದಲೆ ತಲೆಗುರುಳ ಸಿಕ್ಕು ಬಿಡಿಸಬೇಕು
ಬಿಡಿಸಿ ಮಲ್ಲೆ ಮುಡಿಸಬೇಕು
ಹೂವುಗಳ ಮಾತುಗಳ ಇಂಪಾಗಿಸಬೇಕು
ಇಂಪಲಿ ನನ್ನೇ ಮರೆಯಬೇಕು !

ಎಲ್ಲೆಲ್ಲೋ ನೋಡುತಿಹ ಕಣ್ಣ ಸೆಳೆಯಬೇಕು
ಸೆಳೆದು ಹೆಣ್ಣೇ ಎನಬೇಕು
ಒಲವಿಂದ ನಲಿವಿಂದ ಮುತ್ತ ಕದಿಯಬೇಕು
ಕದ್ದು ಪ್ರೀತಿ ಗೆಲ್ಲಬೇಕು !

ಸೋಲಿರದಾ ಪ್ರೀತಿಯಲಿ ಸೋಲು ಕಾಣಬೇಕು
ನಾನು ಸೋತೆ ಎನಬೇಕು !
ಜೀವಗಳ ಪಯಣದಲಿ ಸೋಲೆ ಗೆಲಬೇಕು
ಜೀವನ ಗೆದ್ದು ಮೆರೆಯಬೇಕು !

೩೧-೦೩-೧೨
ಫೋಟೋ :- ಗೂಗಲ್ !