ಬಾಲಿಶ ಕವನಗಳು - ಎರಡು ಜಡೆ ...

ನಿನ್ನೆ ವರೆಗೆ ಈ ಹುಡುಗಿ
ಎರಡು ಜಡೆಯ ಪುಟ್ಟ ಬೆಡಗಿ
ಕಣ್ಣ ತುಂಬ ಹಗಲುಗನಸು
ತುಂಬಿ ನಿಂತ ಬಾಲಿಕೆ
ಇಂದು ಏಕೋ ನಾಚಿಕೆ


ಎರಡು ಜಡೆಗು ಹೂವ ಮುಡಿದು
ಹತ್ತು ಮೊಗದಿ ನಕ್ಕು ನಲಿದು
ಮೀರಿ ಬರುವ ಕೋಪದಿಂದ 
ತುಂಟತನದ ಬೈಗಳು
ಹೊಡೆವ ಪುಟ್ಟ ಕೈಗಳು


ಗಾಳಿಗೊಂದು ಮಾತುಕಟ್ಟಿ
ಮಾತಿಗೊಂದು ಹಾಡು ಕಟ್ಟಿ
ಸೋತು ಗೆಲುವ ಅವಳ ದನಿಗೆ
ಎಲ್ಲ ನುಡಿಯು ಚಂದವೇ
ಸೆಳೆವ ರಾಗ ಗಂಧವೇ


ನಿನ್ನೆ ಎನಿತೋ ಅಂದವಿತ್ತು
ಮಾಧುರ್ಯದ ಗಂಧವಿತ್ತು
ಇಂದು ಏಕೋ ನನ್ನೆದೆಯಲಿ 
ಚಿಂತೆ ತುಂಬಿ ಬಳಲಿದೆ
ಅವಳ ದಾರಿ ಕಾದಿದೆ


ಬಂದ ಸ್ನೇಹಕೆಂತ ಅಂತ್ಯ
ಬದಲಾವಣೆ ಎಂತ ಸತ್ಯ
ಎಲ್ಲಿ ಹುಡುಕಿ ಹೋಗಲಿ ನಾ
ನೀನು ಕೊಟ್ಟ ಸ್ನೇಹವ
ನಿನ್ನಂತ ಪ್ರೀತಿ ಜೀವವ ?


೧೪.೦೬.೨೦೦೫