Saturday, March 31, 2012

ನಾನು ಅವಳು !


ನಗುವಲ್ಲೆ ಸಿಕ್ಕಿರುವ ಅವಳ ನಾನು ನಗಿಸಬೇಕು
ನಗುತ ನೋವು ಕರಗಬೇಕು
ಬಿಗಿಯಾದ ತೋಳಿಂದ ಅವಳ ಬಳಸಬೇಕು
ಬಳಸಿ ನೀ ನನಗೆನಬೇಕು !

ಕಾರಿರುಳ ಕತ್ತಲಲಿ, ಅವಳ ಕೂಗಿ ಕರೆಯಬೇಕು
ಕರೆದು ಕೆನ್ನೆ ಚಿವುಟಬೇಕು
ಹುಸಿಮುನಿಸು ತೋರಿಸುವ ಅವಳ ನೋಡಬೇಕು
ನೋಡಿ ಮತ್ತೆ ರಮಿಸಬೇಕು !

ಮೋಹದಲೆ ತಲೆಗುರುಳ ಸಿಕ್ಕು ಬಿಡಿಸಬೇಕು
ಬಿಡಿಸಿ ಮಲ್ಲೆ ಮುಡಿಸಬೇಕು
ಹೂವುಗಳ ಮಾತುಗಳ ಇಂಪಾಗಿಸಬೇಕು
ಇಂಪಲಿ ನನ್ನೇ ಮರೆಯಬೇಕು !

ಎಲ್ಲೆಲ್ಲೋ ನೋಡುತಿಹ ಕಣ್ಣ ಸೆಳೆಯಬೇಕು
ಸೆಳೆದು ಹೆಣ್ಣೇ ಎನಬೇಕು
ಒಲವಿಂದ ನಲಿವಿಂದ ಮುತ್ತ ಕದಿಯಬೇಕು
ಕದ್ದು ಪ್ರೀತಿ ಗೆಲ್ಲಬೇಕು !

ಸೋಲಿರದಾ ಪ್ರೀತಿಯಲಿ ಸೋಲು ಕಾಣಬೇಕು
ನಾನು ಸೋತೆ ಎನಬೇಕು !
ಜೀವಗಳ ಪಯಣದಲಿ ಸೋಲೆ ಗೆಲಬೇಕು
ಜೀವನ ಗೆದ್ದು ಮೆರೆಯಬೇಕು !

೩೧-೦೩-೧೨
ಫೋಟೋ :- ಗೂಗಲ್ !

Friday, March 30, 2012

ನೀ ದೊರೆತ ಮೇಲೆ ನನಗಿನ್ನಾರು ಬೇಕು ?

ನೀ ದೊರೆತ ಮೇಲೆ ನನಗಿನ್ನಾರು ಬೇಕು
ನಿನ್ನೊಲವಲೇ ನಾನು ಬೆಳಗಬೇಕು !
ನಗೆಯೆಷ್ಟೋ ನೋವೆಷ್ಟೊ ಹಂಚಬೇಕು
ನನ್ನ ಬಾಳಿನ ಪುಟಕೆ ನಿನ್ನ ಕುಂಚ ಸಾಕು !

ನೋವು ಸಾವಿರಬರಲಿ, ನಗೆಗೆ ಸಾವಿರದಿರಲಿ
ಒಲವೆಂಬ ಒಳನದಿಯು ಚಿಮ್ಮುತಿರಲಿ
ಮನದ ವನದೊಳಗೆ ಹೂವರಳಿ ನಗುತಿರಲಿ
ಎಲ್ಲ ಹೃದಯದ ಮಾತು ಹರಿದು ಬರಲಿ

ಪ್ರೇಮವೆಂಬುದು ಬರಿದೆ, ಅಲ್ಲ ಬರಿ ಕಲ್ಪನೆಯೆ
ಮೋಸದಲಿ ಸಿಲುಕಿಸುವ ಪಾಶ ನೊಣೆಯೆ ?
ಮೋಹದಾತುರದಲ್ಲಿ ಹುಟ್ಟಿಬಹ ಕಾಮನೆಯೆ
ಜೀವಿ ಜೀವಿಗು ಇರುವ ಭಾವದೆಣೆಯೆ ?

೩೦-೦೩-೨೦೧೨

Friday, March 16, 2012

ನನ್ನವಳು !



ನನ್ನವಳು ಕೈಹಿಡಿದ ಮಲ್ಲಿಗೆ ಬಳ್ಳಿ, ಹೆರಳೋ
ಕಾನನದ ಕತ್ತಲಿನಂತೆ, ಹುಬ್ಬೆರಡು ಸೋನೆ
ಚಿನ್ನದ ಮಳೆಗೆ ಮೂಡಿದ ಕಾಮನಬಿಲ್ಲು !
ಮುನ್ನಿನಾ ಮಾತುಗಳೆ ಕೋಗಿಲೆಯ ಕುಕಿಲು !

ಅವಳತ್ತಾಗ ಒಂದು ಹನಿ , ಅಲ್ಲೆ ಮೂಗನು
ಸವರಿ ನತ್ತಾಯಿತೇ? ಎಂದು ಕನವರಿಕೆ !
ಇವೆರಡು ಕಂಗಳ ನೋಟಕ್ಕೆ ಮನಕರಗಿ
ತವಕವೇನ್ ತುಟಿಯಂಚಿನೊಳಗೆ ನಗುವೇ?

ಇಲ್ಲಿ ಕಾದಿರು,ಎಂದು ಬೇಯುವ ತುಟಿಯೊ
ಸಲ್ಲಿಸಿತೆ ಸವಿಯ ? ಅಲ್ಲ ಮಸಾಲೆ ಮದ್ದು !
ಎಲ್ಲಿಯಾದರೂ ಬಿದ್ದು ಹೋದೀತೆಂಬ ನಗು
ಸುಳ್ಳಲ್ಲ, ಏಳಲಾಗದೆ ನನ್ನ ಗೆಲುವ ಸೋಗು!

Wednesday, March 14, 2012

ಕೊಳಲನೂದು ಮಾಧವಾ ರಾಧೆ ಬರುವಳು


ಕೊಳಲನೂದು ಮಾಧವಾ 
ರಾಧೆ ಬರುವಳು !
ನಿಲಲಾರಳು ದನಿಯ ಕೇಳಿ
ಬಂದೆ ಬರುವಳು !


ನೊಂದಿಹಳೆ ರಾಧೆ ಹೇಳು
ಮುನಿದು ಹೋದಳೇ
ಚಂದದಿಂದುಲಿವ ನುಡಿಗೆ
ಮರಳಿ ಬಾರಳೇ ?


ಪ್ರೇಮದುಸಿರ ಹರಿಸಿ ನೀನು
ನುಡಿಸೆ ಮುರಳಿಯಾ
ಸಾಮದೊಳು ಕರೆವುದದು
ನಿನ್ನ ರಾಧೆಯಾ


ಆ ನೆರಳೊಳು ನೋಡು ರಾಧೆ
ಮರಳಿ ನಿಂದಳೇ ?
ಜೇನು ದನಿಯ ಮುರಳಿ ಕರೆಗೆ
ಸಿರಿಯು ಬಾರಳೇ ?


೧೩-೦೩-೨೦೧೨