Monday, April 30, 2012

ಹೆಸರಿಡದ ಚಿತ್ರಗಳು !


ಬೆನ್ನಿನಲ್ಲಿ ಗೆರೆಯೆಳೆದ
ಮೊನ್ನಿನ ಮಳೆಗೆ ಹೀಗೆಯೇ !
ಹುಟ್ಟಲಾರದ ಕೆಲವು ಆಸೆಗಳು
ಮೊಟ್ಟೆಯಿಟ್ಟಿದೆ.

ಈ ಸಲವಾದರೂ ಮೋಸವಾಗದೆ
ಹೊಸ ಜೀವದ ಹುಟ್ಟು ಕಾಯುವ ಕ್ರೌಂಚ!
ಬೇಡ!
ಕೆಮೆರಾದ ಕಣ್ಣಲ್ಲಿ ಕಾಯುತ್ತಿದ್ದಾನೆ !

ಸುಡದೆ ಶುದ್ದವಾಗುವ ಸೀತೆ
ಸಿದ್ದಳಾಗುವಳೆಂದು,
ಒಳಗೆ ರಾವಣ ನಗುತ್ತಿದ್ದಾನೆ !

ಇದನ್ನೆಲ್ಲ ಒಂದೇ ಚೌಕಟ್ಟಿನಲ್ಲಿ
ಹಿಡಿದಿಡಲಾಗದೆ!
ಬೆಳಗಿನ ಜಾವದ ಅವಳ ಮುಂಗುರುಳಾಗಿದೆ

Wednesday, April 25, 2012

ಯುವಕನ ಹಾಡು !

೧.
ಓ ತಂದೆ
ಈ ಬಿಸಿಲು ಏಕೆ ತಂದೆ ?

ಹೀಗೆಂದ ಯುವಕ
ಕರಬೂಜ ತಿಂದ,
ಭಿತ್ತಕ್ಕೆ ಬಿಸಿಲು,
ಬಿಸಿಗೆದ್ದ ತೊಗಟೆ
ಮೊದಲ ಮಳೆಗೆ
ಟಿಸಿಲೊಡೆದದ್ದ ಕಂಡ


ಅವನು ಗುರು
ಚೈತನ್ಯದ ಚಿಗುರು!

ಬಂದವರಿಗೆಲ್ಲಾ ಆನಂದ ತಂದ
ಈ ಯುವಕ ಬಂದ !
ಗುರುವಿನ ಕಾವಿಯ ನೂಲು
ಸೀರೆಯ ರೇಶಿಮೆಯ ಜೊತೆಗಿತ್ತು !

೩.
ಬೆಂಕಿ ಸ್ವಾಮಿ !
ಮುಟ್ಟಲಿಲ್ಲವೋ ಕಾಮಿ,

ವಯಸ್ಸೆಷ್ಟು ? ಕೇಳಿದ
ಯುವಕಗಿಪ್ಪತ್ತಾರು ಎಂದ !
ಇದ್ದ ಕಾಮಕ್ಕೋ ನೂರು
ಒಣಗಿದ ಗಿಡಮರಕ್ಕೆ ಹಸಿರು ಬೇರು !

೪.
ಒಡತಿ ಇದ್ದಾಳೆಯೇ ?
ಇದ್ದವಳು ವಶ್ಯ !

ಹುಡುಕಿದ್ದು ಗಂಧ
ಮೀನಲ್ಲಿ ಸಿಕ್ಕಿದ್ದು ಯಾವ ಬಂಧ ?
ಧಾತುಚಲನೆಗೆ
ಮೀನಿನ ಹೆಜ್ಜೆಗಳು
ಕಾಣಲಾರದು, ಯುವಕನೆಂದ !

Tuesday, April 17, 2012

ಪ್ರೀತಿ ಎಂದರೇನೆ ಸಖಿ ?

ಗುರುತಿಲ್ಲದ ಹೂಗಳಾಯ್ದು
ಸರತಿಯಲ್ಲೆ ಪೋಣಿಸುತ್ತ
ಧರಿಪ ಮಾಲೆಯೆನ್ನುವುದು !
ಪ್ರೀತಿ ಎಂದರೇನೆ ಸಖಿ ?

ಮಳೆಗೆಜ್ಜೆಯ ತಾಳದಲ್ಲಿ
ಹಳೆಯ ಕೊಳೆಯ ತೊಳೆಯುತಿಂತು
ಸುಳಿವ ನವೋತ್ಸಾಹ ಸೊಗಸೆ !
ಪ್ರೀತಿ ಎಂದರೇನೆ ಸಖಿ ?

ನನಗೆ ನೀನು ಕಾಯುವುದು
ನಿನ್ನ ನೆನೆದು ಬೇಯುವುದು
ಕನಸು ನನಸು ನೋವು ನಲಿವು !
ಪ್ರೀತಿ ಎಂದರೇನೆ ಸಖಿ ?

Sunday, April 8, 2012

ಇನ್ನೊಂದು ಕೋರಿಕೆ !


ಏಕಾಂತವನು ಹುಡುಕಿ
ಅವಳ ಮುಂಗುರುಳ ನೇವರಿಸಿ
ಗಲ್ಲವ ಹಿಡಿದು
ಮುತ್ತನೊತ್ತುವ ಸಮಯದೊಳು
ನೀ ರಿಂಗಣಿಸದಿರು ಮೊಬೈಲೇ !
ಏಕಾಂತವಿದ್ದರೂ ಅದು ಜೈಲೇ !!

ನರುಗಂಪಿನ ಅವಳ ತುಟಿಗಳು
ನನ್ನ ಮೋರೆಯನ್ನಪ್ಪಿ ಚುಂಬಿಸೆ
ಅದುರುತ್ತಿರುವ ವೇಳೆ
ನೀ ಕಾಡಬೇಡ ಕ್ಯಾಮೆರದ ಕಣ್ಣೆ
ಅವಳ ಮತ್ತೆ ನನ್ನ ಚಿತ್ರವ
ಹಳೆತಾಗಿಸಿ ಉಪ್ಪಿನಕಾಯಿ ಹಾಕಬೇಕಾಗಿಲ್ಲ !

ದೂರದ ದರ್ಶನ ಮಾಟ !
ಸಮಯಕ್ಕೂ ಸರಸಕ್ಕೂ ಬೇಟ
ಜಗಳ,ವಾರ್ತೆ, ಆಟಗಳ ನೋಡಿ
ನಾಳೆಯ ಚಿಂತೆಗಳ ದೂಡಿ
ನಿರ್ಭಂದಿಸಿದ ಗಳಿಗೆಯೊಳು ಇಷ್ಟೇ
ಎಂದೆನುತನುಭವಿಸಬೇಕು !
ಇಲ್ಲವಾದರೆ ನೆಮ್ಮದಿಯ ನಾಳೆ ಇಲ್ಲ?