ಪುಟ್ಟನ ಹಾಡು

ಬಾನಲಿ ಏರುತ ಮೋಡದಿ ಅಡುಗುತ
ಆಡುವ ಚಂದಿರ ನನಗಿಷ್ಟ
ಏತಕೆ ಸುಮ್ಮನೆ ಮಂಜಿಗೆ ತಿರುಗುವೆ
ಎಂದೆನೆ ಹೇಳಿದ ನಂ ಪುಟ್ಟ!

ಪುಟ್ಟನಿಗೇಕೋ ಚಂದಿರ ಕಾಣದೆ
ಹೋದರೆ ರಾತ್ರಿಗೆ ಹಸಿವಿಲ್ಲ
ಬೆಳಗಿನ ಜಾವದಿ ಬೇಗನೆ ಏಳುವ
ಸೂರ್ಯನ ಪ್ರೀತಿ ಸಾಲಲ್ಲ

ದಿನ ದಿನ ಹಿಗ್ಗುವ ಚಂದಿರ ಬೇಕು
ಕುಗ್ಗುವ ಚಂದಿರ ಬೇಡದವ!
ಸಿಟ್ಟದು ಬರುವುದು ಮೂಗಿನ ಮೇಲೆ
ತಿಂದರೆ ಚಂದ್ರನ ಮೋಡದವ.

ಪುಟ್ಟನ ಸುತ್ತಲೂ ಚಂದ್ರನು ಸುತ್ತುವ
ಪುಟ್ಟನ ಕಣ್ಣಲೆ ನಕ್ಷತ್ರ!
ಪುಟ್ಟನೆ ಭೂಮಿಯು ಆ ಚಂದಿರನಿಗೆ
ಪುಟ್ಟನು ಚಂದಿರನಾ ಮಿತ್ರ.